汪家好婆毫不示弱，跨前一步，眼睛睁圆了，盯牢宝宝，讲：“哪能？拿侬养大了是伐？想造反了是伐？我倒要看看，侬今早哪能格造反法。”
宝宝憋了叫关辰光，吼了一句：“侬，侬无理取闹。”
汪家好婆一听跳了起来……
就在这个辰光，门外头传来石硬的宁波闲话：“汪宝宝电话！汪宝宝电话。”是传呼电话亭的宁波老头，举只铁皮喇叭筒在门外头哇啦哇啦地叫着。
老底子的弄堂里，家家户户都没有电话，啥叫手机，更加连想也没有想着过，有啥急事体，打电话就靠传呼。一有电话，宁波老头嘴巴上套只铁皮喇叭筒，哇啦哇啦一叫，哪一家人家只要有婚丧喜事，头痛脑热，钆朋友，婚外情……只被宁波老头一叫，像有线广播，一弄堂的人马上统统晓得。没啥隐私好讲。
汪家屋里，汪家好婆跟宝宝正好在斗法，斗得不可开交，没有及时回应宁波老头。
宁波老头又叫了起来：“李莺莺叫宝宝马上回电话。李莺莺叫宝宝马上回电。”宁波老头的四分洋钿的传呼费没有收到，是不会收场的，会变着花样一遍一遍叫下去。一直叫到你有了回应，付了钞票。
这下汪家好婆和宝宝都有反应了，宝宝刚刚起身想要出去接电话。
汪家好婆一把栏牢，讲：“侬听听，侬听听，还讲我无理取闹？刚刚跟人家死到不晓得啥地方去白相回来，一歇歇功夫，电话马上就追过来了，离也离不开了。当我不晓得，班也不上，两个人粘了一道，混出去做啥？不是外插花是啥！侬是有老婆的男人，还要花插插，花插插，要遭天打雷劈的，侬晓得伐！”
宝宝听了汪家好婆的闲话，虽然有些闲话讲得夸大其词，叫人听了恼火，不过，看得出来，汪家好婆拿情况摸得很透。有些事体的实情，宝宝确实有点讲不出口，心里也有点虚，只好支支吾吾着讲：“不要瞎讲八讲。把人家李莺莺拉进来讲事体，算啥？侬要讲，就讲我好了。”
汪家好婆一看，宝宝在退缩，更加上劲了：“汪宝宝，我今早叫侬汪宝宝，关照侬，电话不许接，艾米丽的医院里，去也得去，不去也得去。我回头也会去医院检查。”
汪家好婆只有在极端情况的辰光，才会连名带姓地称呼宝宝。宝宝晓得事体的严重程度。进退两难，有点尴尬了。
门外头，宁波老头还在一遍一遍地穷叫：“汪宝宝电话，李莺莺叫侬马上回电！汪宝宝电话，李莺莺叫侬马上回电！”
再叫下去，整条弄堂都要听到了……
喜欢上海弄堂里吃泡饭的咪道请大家收藏：(m.x33yq.org)上海弄堂里吃泡饭的咪道33言情更新速度全网最快。